ក្រុមបាល់ទាត់ជម្រើសជាតិកម្ពុជាក្រោមអាយុ១៦ឆ្នាំ (U-16) បានប្រកួតចាញ់ក្រុមម្ចាស់ផ្ទះយុវជនក្រោមអាយុ១៦ឆ្នាំរបស់ក្លិប Hanio T&T របស់ប្រទេសវៀតណាម ដោយលទ្ធផល ៤ទល់២ ក្នុងជំនួបមិត្តភាពអន្តរជាតិនាល្ងាចថ្ងៃសៅរ៍ទី១៤ ខែឧសភា នេះនៅក្នុងទីក្រុងហាណូយ។
នេះជាការប្រកួតមិត្តភាពអំឡុងពេលសហព័ន្ធកីឡាបាល់ទាត់កម្ពុជា (FFC) បានបានបញ្ជូនក្រុម U-16 របស់ខ្លួន ទៅហ្វឹកហាត់ និងប្រកួតមិត្តភាពនៅប្រទេសវៀតណាម រយៈពេល១សប្ដាហ៍ ដោយបានចេញដំណើរទៅកាលពីល្ងាចថ្ងៃអង្គារ ទី១០ ខែឧសភា ថ្មីៗនេះ ដើម្បីពង្រឹងសមត្ថភាពត្រៀមទទួលធ្វើជាម្ចាស់ផ្ទះក្នុងពានរង្វាន់យុវជនប្រចាំតំបន់អាស៊ាន AFF U-16 Championship 2016 ក្នុងខែកក្កដា ខាងមុខ។
អំឡុងពេលហ្វឹកហាត់បោះជំរំនៅទីក្រុងហាណូយ ប្រទេសវៀតណាម ក្រុម U-16 កម្ពុជា ត្រូវប្រកួតមិត្តភាពកម្ដៅសាច់ដុំជាមួយក្រុមម្ចាស់ស្រុកចំនួន៣លើកគឺនៅថ្ងៃទី១២ ខែឧសភា បានប្រកួតស្មើគ្នាជាមួយក្រុម U16 Viettel ដោយលទ្ធផល ២ទល់២ ហើយនៅថ្ងៃសៅរ៍ ទី១៤ ខែឧសភា នេះបានចាញ់ក្រុម Hanio T&T របស់ទីក្រុងហាណូយ និងចុងក្រោយនៅថ្ងៃចន្ទ ទី១៦ ខែឧសភា ត្រូវប្រកួតជាមួយក្រុម U15 Academy (U15 សាលាបាល់ទាត់ជាតិវៀតណាម) នៅវេលាម៉ោង៣:៣០ នាទីដូចគ្នា លើទីលានHanoi Football Training Center។
ប្រភពពីមន្ត្រីរបស់សហព័ន្ធបានឲ្យដឹងថា ៖ «កីឡាករ U-16 កម្ពុជា ទៅហ្វឹកហាត់ និងប្រកួតនៅប្រទេសវៀតណាមពីថ្ងៃទី១០ដល់១៧ ខែឧសភា ឆ្នាំ២០១៦ ទើបត្រឡប់មកវិញ។ ពួកគេនឹងបន្តទៅហ្វឹកហាត់ និងប្រកួតនៅប្រទេសថៃនៅ ខែមិថុនា ដែលជាការត្រៀមចុងក្រោយមុន១សប្ដាហ៍សម្រាប់ការប្រកួតជើងឯកយុវជនអាស៊ានអាយុក្រោម ១៦ ឆ្នាំ ២០១៦ ដែលនឹងប្រព្រឹត្តនៅរាជធានីភ្នំពេញ ព្រះរាជាណាចក្រកម្ពុជានៅខែកក្កដា»។
ក្រុម U-16 កម្ពុជា ធ្វើដំណើរទៅកាន់ប្រទេសវៀតណាម ក្រោមការដឹកនាំដោយលោក ឈន ផៃ ជាអ្នកចាត់ការទូទៅរបស់ក្រុម លោក Inoue Kazunori ជាគ្រូបង្វឹក លោក គឹម ភក្ដី, លោក ឡុង រិទ្ធា និងលោក ប្រាក់ វណ្ណី ជាគ្រូជំនួយព្រមលោក ហ៊ុន ប៉េងឡុង ជាគ្រូពេទ្យ ខណៈកីឡាករមានគ្នា២៣នាក់។
ចំណែកកីឡាករវិញមានគ្នា ២៣ នាក់វិញមាន ទេស សម្បត្តិ, ផាច់ សុជាវិឡា, សឿត ណាវ៉ា, សេត ម៉ាន់សោត, គង់ រ៉ាផាត់, ទុន សំឆាន់, សៀន ចាន់ធា, រួត ប៊ុននួ, សាន គឹមហេង, ហុល គឹមហួច, គង់ ចាន់សិរិសា, ទៀត គឹមហេង, ឡង ថេន, ឡុង ម៉េងហាវ, ត្រាយ វិចិត្រ, ផន តាចនិច, ហេង ទីណា, ស៊ាន សុភ័ត្រា, ឈៀង វិស្ណុ, ស៊ួន សុភូត្រា, ស៊ីន កក្កដា, យឿ សាហ្វីនិង ស្វែង សំណាង៕
ប្រភព៖ កម្ពុជាថ្មី
loading...
0 comments:
Post a Comment