សហព័ន្ធកីឡាបាល់ទាត់កម្ពុជា បានចេញបញ្ជីឈ្មោះក្រុមជម្រើសជាតិកម្ពុជា កាលពីពេលថ្មីបានបង្ហាញបញ្ជីឈ្មោះក្រុមកីឡាករជម្រើសជាតិចំនួន២៥ នាក់ដើម្បីត្រៀមប្រកួតជាមួយក្រុមកោះតៃវ៉ាន់ក្នុងវគ្គជម្រុះជុំបឋម នៃពានរង្វាន់ជើងឯកទ្វីបអាស៊ី AFC Asian Cup UAE 2019 ខណៈនៅព្រឹកថ្ងៃអង្គារ ម្សិលមិញបានកោះហៅកីឡាករវ័យក្មេង លី វ៉ាហេទ របស់ក្លិបបឹងកេតអង្គរ បញ្ជូលក្នុងបញ្ជីក្រុមជម្រើសជាតិថែមទៀត។
យោងតាមប្រភពមកពីថ្នាក់ដឹកនាំក្រុមជម្រើសជាតិកម្ពុជា បានឱ្យដឹងថាការសម្រេចជ្រើសរើសយកខ្សែការពាររូបនេះដាក់ក្នុងក្រុមជម្រើសជាតិក្រុមធំ ក៏ព្រោះរូបគេបង្ហាញទម្រង់លេងបានយ៉ាងល្អទាំងនៅក្នុងក្លិប និងក្នុងពេលចូលរួមជាមួយក្រុមជម្រើសជាតិក្រោមអាយុ១៩ឆ្នាំនាពេលកន្លងមក។ រូបគេនឹងចូលហ្វឹកហាត់ជាមួយក្រុមជម្រើសជាតិ ចាប់ពីថ្ងៃទី២៣ ខែមិថុនា តទៅ។
សម្រាប់ថ្នាក់ដឹកនាំក្រុមជម្រើសជាតិកម្ពុជាមានលោក ឆាំង ពិសិដ្ឋ ជាអ្នកចាត់ការទូទៅរបស់ក្រុម ហើយលោក លី តែហ៊ុន (Lee Tae Hoon) ជាគ្រូបង្វឹក ស្របពេលលោក អ៊ុង កងយ៉ានិត លោក អ៊ុំ សាវង្ស លោក ហោ សុខហេង ជាគ្រូជំនួយ ហើយលោក សួង ភិរម្យ ជាគ្រូអ្នកចាំទី ខណៈលោក ហៃ សក្ខរី និងលោក សៀង ប៊ុណ្ណា ជាគ្រូពេទ្យ។
ចំណែកបញ្ជីឈ្មោះកីឡាករវិញមានកីឡាករព្រះខ័នរាជស្វាយរៀង សឿយ វិសាល, ប្រាក់ មុន្នីឧត្តម, ណុប តុលា, ហួយ ផល្លីន, សំអឿន ពិដោរ, នេន សុធារ័ត្ន, សុក សំណាង ចំណែកកីឡាករ របស់ក្រសួងការពារជាតិ មាន ច្រឹង ពលរដ្ឋ, ឈិន ឈឿន និង អ៊ុំ សេរីរ័ត្ន។ ចំពោះក្លិបបឹងកេតអង្គរ មាន ចាន់ វឌ្ឍនាការ, សុខ សុវណ្ណា, ឃួន ឡាបូរ៉ាវី, រស់ សំអឿន, ស៊ូ យ៉ាទី និងហុង ផេង ស្របពេលក្លិបអគ្គស្នងការដ្ឋាននគរបាលជាតិ មាន ទិត្យ ឌីណា និង ស៊ុន វ៉ាន់ដេត ហើយណាហ្គាវើល មាន សុះ ស៊ូហាណា និងង៉យ ស្រ៊ីន។ ចុងក្រោយក្លិបភ្នំពេញក្រោន មាន កែវ សុខសិលា, កែវ សុខផេង, ប៊ិន ចន្ថាធារី, កុក បូរីស និង ឡេង មករា។
តាមគម្រោងរបស់សហព័ន្ធកីឡាបាល់ទាត់ទ្វីបអាស៊ី (AFC) ការប្រកួតជម្រុះជើងទី១ នឹងប្រព្រឹត្តទៅចាប់ពីថ្ងៃទី២ ខែមិថុនា ខាងមុខដោយក្រុមតៃវ៉ាន់ បើកទ្វាកីឡដ្ឋាន Taipei Municipal Stadium ក្នុងទីក្រុង Kaohsung របស់ខ្លួនទទួលក្រុមជម្រើសជាតិកម្ពុជា វេលាម៉ោង៧ល្ងាច (ម៉ោង៦ល្ងាចនៅកម្ពុជា) ខណៈជើងទី ២ នឹងធ្វើឡើងនៅពហុកីឡដ្ឋានជាតិ លើទឹកដីរាជធានីភ្នំពេញ របស់កម្ពុជាវិញម្តង នៅថ្ងៃទី ០៧ ខែ មិថុនា ឆ្នាំ២០១៦ ម៉ោង៦:៣០ល្ងាច។
មុនចេញដំណើរទៅកាន់កោះតៃវ៉ាន់ ក្រុមជម្រើសជាតិកម្ពុជា ត្រូវប្រកួតមិត្តភាពអន្តរជាតិជាមួយក្រុមទីម័រខាងកើត នៅវេលាម៉ោង៦:៣០ នាទីល្ងាចលើទីលានពហុកីឡដ្ឋានជាតិក្នុងរាជធានីភ្នំពេញ ក្នុងថ្ងៃអាទិត្យ ទី២៩ ខែឧសភា ឆ្នាំ២០១៦ វេលាម៉ោង៧យប់៕
ប្រភព៖ កម្ពុជាថ្មី
loading...
0 comments:
Post a Comment