និវត្តន៍ជនជាជនបង្គោលក្នុងការទំនាក់ទំនងព័ត៌មានក្នុងមូលដ្ឋាន

បាត់ដំបង៖ ឯកឧត្តមនាយឧត្តមសេនីយ៍ ម៉ៅ ច័ន្ទតារា អគ្គនាយកនៃអគ្គនាយកដ្ឋានអត្តសញ្ញាណកម្មបានលើកឡើងថា និវត្តន៍ជនគឺជាជនបង្គោលក្នុងការទំនាក់ទំនងទទួលព័ត៌មានក្នុងមូលដ្ឋាន ក្នុងកិច្ចសហការការងារ សន្តិសុខ និងផ្សព្វផ្សាយនូវព័ត៌មានដល់ប្រជាពលរដ្ឋ និងអាជ្ញាធរមូលដ្ឋាន ឯកឧត្តមបានលើកឡើងក្នុងពិធីសំណេះសំណាលជាមួយមន្ត្រី ដែលចូលនិវត្តន៍ ក្នុងស្រុករុក្ខគិរី ខេត្តបាត់ដំបងកាលពីរសៀលថ្ងៃទី២០ ខែឧសភា ឆ្នាំ២០១៦ ។

ឯកឧត្តមនាយឧត្តមសេនីយ៍ ម៉ៅ ច័ន្ទតារា បានមានប្រសាសន៍បន្តទៀតថា និវត្តន៍ជនមិនត្រឹមជាជនបង្គោល ហើយក៏ជាជនគំរូ ក្នុងការពិភាក្សាការងារ ចែករំលែកនូវបទពិសោធន៍ជូនដល់មន្ត្រីជំនាន់ក្រោយ ក្នុងន័យបម្រើជាតិ និងប្រជាពលរដ្ឋ ជាពិសេសនៅតាមមូលដ្ឋាន ។

ក្នុងឱកាសនោះដែរ ឯកឧត្តមនាយឧត្តមសេនីយ៍ ក៏បានសំណូមពរដល់មន្ត្រីចូលនិវត្តន៍ទាំងអស់ ជួយក្នុងការទំនាក់ទំនង ផ្សព្វផ្សាយ នូវរាល់ព័ត៌មានដែលប្រជាពលរដ្ឋនៅតាមមូលដ្ឋានត្រូវទទួល ដើម្បីរួមគ្នាថែរក្សាសន្តិសុខ ស្ថេរភាព សណ្ដាប់ធ្នាប់ ក្នុងមូលដ្ឋាន និងសង្គមជាតិផងដែរ ។

ឯកឧត្តមនាយឧត្តមសេនីយ៍ ម៉ៅ ច័ន្ទតារា បាននាំយកនូវអំណោយមួយចំនួនជូនដល់មន្ត្រីចូលនិវត្តន៍ក្នុងស្រុករុក្ខគិរី ១៥នាក់ ក្នុងម្នាក់ៗទទួលបាន អង្ករ ១បាវ ៥០គីឡូក្រាម, មី ១កេស, ត្រីខ ១យួរ , ទឹកស៊ីអ៊ីវ ១យួរ និងថវិកា ២០០.០០០រៀល ៕