ខេត្តបាត់ដំបង ៖ កម្លាំងអាវុធហត្ថ ខេត្តបាត់ដំបង បានឃាត់ខ្លួន បុរសម្នាក់ ជាមេខ្លោង ចែកចាយថ្នាំញៀន និងដកហូត វត្ថុតាងថ្នាំញៀន ប្រភេទម៉ាទឹកកក ៣១កញ្ចប់ ស្មើទម្ងន់ ៣៩៤,៧៦ក្រាម យ៉ាម៉ា ៥គ្រាប់ និងសម្ភារៈមួយចំនួន កសាងសំណុំរឿង បញ្ជូនទៅតុលាការ នារសៀល ថ្ងៃទី១៥ ខែឧសភា ឆ្នាំ២០១៦ ចាត់ការតាមនីតិវិធី។
មន្ត្រីអាវុធហត្ថ ខេត្តបាត់ដំបង បានឲ្យដឹងថា បុរសសង្ស័យ ដែលឃាត់ខ្លួនមាន ឈ្មោះ សោម ស៊ីន អាយុ ៣២ឆ្នាំ ទីលំនៅមិនពិតប្រាកដ ត្រូវបានឃាត់ខ្លួន កាលពីវេលាម៉ោង ១រសៀល ថ្ងៃទី១៤ ខែឧសភា ឆ្នាំ២០១៦ នៅបរិវេណ វត្តកណ្តាល ភូមិរំចេក៤ សង្កាត់រតនៈ ក្រុងបាត់ដំបង។ វត្ថុតាងដកហូត មានថ្នាំញៀនប្រភេទ ម៉ាទឹកកក ៣១កញ្ចប់ ស្មើទម្ងន់ ៣៩៤,៧៦ក្រាម យ៉ាម៉ា ៥គ្រាប់ ដាវ ៣ដើម ទូរស័ព្ទ ៣គ្រឿង និងម៉ូតូ ៤គ្រឿង (ខ្ចីបងប្អូន)។
បុរសសង្ស័យ បានសារភាពថា ខ្លួនមានឈ្មោះ សោម ស៊ីនបានលក់ចែកចាយ ថ្នាំញៀន ៦ខែ គឺនៅក្រុងប៉ោយប៉ែត ខេត្តបន្ទាយមានជ័យ ចំនួន ៤ខែ និងនៅខេត្តបាត់ដំបង ចំនួន ២ខែ។ មន្ត្រីអាវុធហត្ថ ខេត្តបាត់ដំបង បានបញ្ជាក់ថា ជនសង្ស័យខាងលើ រកស៊ីចែកចាយថ្នាំញៀន ច្រើនឆ្នាំមកហើយ តែដោយការលក់ចល័ត ទើបសមត្ថកិច្ចចាប់មិនបាន ប៉ុន្តែ ២ខែនេះ សមត្ថកិច្ចប្រម៉ាញ់ រហូតចាប់បង្ក្រាបបាន ជាស្ថាពរ៕
loading...
0 comments:
Post a Comment