ហង្ស ម៉ារីនី បង្ហាញការដឹងគុណឪពុកម្តាយ នាឱកាសថ្ងៃធ្វើខួបកំណើត

ភ្នំពេញ ៖ នៅថ្ងៃទី១៤ ខែឧសភា ឆ្នាំ២០១៦នេះជាថ្ងៃខួបកំណើតរបស់តារាសម្ដែងរាងតូចច្រឡឹងលេចធ្លោលើសកម្មភាពមនុស្សធម៌ជួយសង្គមកញ្ញា ហង្ស ម៉ារីនី គម្រប់អាយុ២១ឆ្នាំ។ ប៉ុន្តែបើតាមការដឹងនៅថ្ងៃខួបកំណើតរបស់នាងថ្ងៃនេះ គឺ ពុំត្រូវបានរៀបចំធ្វើលក្ខណៈធំដុំមានការអញ្ជើញភ្ញៀវចូលរួមច្រើនដូចតារាសិល្បៈប្រុស- ស្រីដ៏ទៃទៀតឡើយពោលគឺ ពិធីនេះមានការជួបជុំញ៉ាំអាហារសប្បាយរីករាយបែបក្រុមគ្រួសារប៉ុណ្ណោះ។

ទន្ទឹមពេលជាមួយគ្នានៃថ្ងៃខួបកំណើតរបស់កញ្ញា ហង្ស មារីនី នាថ្ងៃនេះដែរ នៅលើបណ្តាញសង្គមហ្វេសប៊ុករបស់នាងគេក៏បានសង្កេតឃើញមានការសរសេរបង្ហោះភ្ជាប់ជាមួយរួបថតមួយសន្លឹកបង្ហាញនូវការដឹងគុណរបស់លោកឪពុកម្តាយ ដែលបានផ្តល់កំណើតនិងចិញ្ចឹមបីបាច់ថែរក្សានាងតាំងពីវ័យកុមារភាពរហូតដល់ធំពេញរូបពេញរាង និងបានចូលសាលារៀនមានចំណេះផងនោះ។

តារាស្រីថ្ពាល់ខួចកញ្ញា ហង្ស ម៉ារីនី បានបង្ហាញពីអារម្មណ៍ដឹងគុណឪពុកម្តាយថា ថ្ងៃនេះជាថ្ងៃខួបកំណើតកូន ជាដំបូង កូនសូមអរគុណលោកអ្នកមានគុណទាំងទ្វេរ ដែលបានផ្ដល់កំណើតជូនកូន ឲ្យកូនបានមើលឃើញពិភពលោកដ៏ធំមួយនេះនិងចិញ្ចឹមបីបាច់ថែរក្សារូបកូនតាំងពីបាតជើងក្រហម ដោយមិនខ្លាចភាពលំបាក នឿយហត់រហូតមកបើគ្មានលោកទាំងពីរក៏គ្មានរូបកូនស្រីម្នាក់នេះដែរ។

តារាសម្ដែងនិងជាថៅកែហាងវ័យក្មេងកញ្ញា ហង្ស ម៉ារីនី បានបញ្ជាក់បន្ថែមថា អ្វីដែលកូនប្រាថ្នាក្នុងថ្ងៃនេះ គឺសុំឲ្យលោកទាំងពីរជាអស់ពីជំងឺ សុខភាពល្អ និងជោគជ័យគ្រប់ភារកិច្ច ជាពិសេសគឺធ្វើជាម្លប់ដ៏ត្រជាក់ និងកក់ក្តៅរបស់កូនៗជារៀងរហូត។ ក្រៅតែពីអរគុណដល់លោកឪពុក អ្នកម្ដាយជាទីស្រលាញ់ហើយនោះតារាស្រីកញ្ញា ហង្ស ម៉ារីនី ក៏បានឆ្លើយតបនិងអរគុណចំពោះFan ទាំងអស់ដែរបានគាំទ្រនិងផ្ញើសារជូននាងនាកាសថ្ងៃខួបកំណើតនេះផង៕