ការប្រកួតនៅក្នុងព្រឹត្តិការណ៍Ganzburg Top Fighter មានការប្រកួតអន្តរជាតិ២គូ ដោយរួមមានកីឡាករ សេក គឹមរួន មកពីក្លិបអង្គរមានជ័យ ប្រកួតជាមួយកីឡាករថៃឈ្មោះ Yorth Phachngam និងកីឡាករសូត្រ ប៊ុនធី មកពីក្លិបបក្សីស្លាបដែក ប្រកួតជាមួយកីឡាករថៃឈ្មោះ Anou Vath ។ ការប្រកួតនាពេលនោះ គេចាប់អារម្មណ៍ថា កីឡាករសូត្រ ប៊ុនធី និងគូប្រកួតទទួលបានការចាប់អារម្មណ៍ជាងគេដោយសារតែកីឡាករថៃគឺជាជើង ខ្លាំង ហើយមានសមត្ថភាពខ្លាំងដែលគេជឿជាក់តិចបំផុតថា កីឡាករកម្ពុជានឹងឈ្នះ ។ ការប្រកួតនៅដើមទី កីឡាករថៃមានសន្ទុះខ្លាំងណាស់ ហើយបើនិយាយពីកែង ម៉ាត់ និងទាត់វិញ គឺកីឡាករសូត្រ ប៊ុនធី ទប់មិនចង់ជាប់នោះឡើយ ដោយសារតែបច្ចេកទេសរបស់កីឡាករថៃខ្លាំងក្លា ។ ក្នុងទឹកទី២ សមត្ថភាពរបស់កីឡាករមកពីទីក្រុងបាងកក កាន់តែរំលេចធ្វើឲ្យសង្វៀនទាំងមូលកន្ត្រាក់អារម្មណ៍ ប៉ុន្តែនៅក្នុងទឹកនេះ គេក៏ត្រូវកីឡាករកម្ពុជាបញ្ចេញកណ្ដាប់ដៃ និងទាត់សងវិញមកណយផងដែរ។ ការប្រកួតទាំងមូលទទួលបាននូវសម្រែកហ៊ោកញ្ជ្រៀវ និងទះដៃយ៉ាងកងរំពង បន្ទាប់ពីចុងទឹកទី២ កីឡាករទាំងពីរស្ទុះវាយគ្នាទៅមកៗ ដែលសឹងមិនចង់ឲ្យអ្នកទស្សនាដកភ្នែក ឬដកដង្ហើម ។ នៅក្នុងវិនាទីដ៏ក្ដៅនោះហើយដែលកីឡាករថៃត្រូវស្វាគមន៍ដោយមួយកែង ពេញទំហឹងចំសៀតផ្កា ហើយដួលសន្លប់ភីងដោយនឹកស្មានមិនដល់ក្នុងពេលដែលការប្រកួត ទាំងមូល គឺកីឡាករថៃក៏ខ្លាំងធ្វើឲ្យសូត្រ ប៊ុនធី ក៏ប៊ិះនឹងភ្លាត់ដូចគ្នា ។ អ្នកទស្សនាស្រែកហ៊ោកញ្ជ្រោលយ៉ាងខ្លាំង បន្ទាប់ពីអ្នកភ្លាត់មិនមែនជាកីឡាករកម្ពុជា ហើយធ្វើឲ្យជើងខ្លាំងថៃសម្រេចចិត្តបោះបង់ការប្រកួតនៅចុងទឹកទី២ ដែលមិននឹកស្មានដល់ ។
គួរបញ្ជាក់ផងដែរថា កីឡាករសូត្រ ប៊ុនធី ធ្លាប់ប្រកួត៧៣លើក ឈ្នះ៦៣លើក ចាញ់៩លើក និងស្មើ១លើក ឯកីឡាករថៃធ្លាប់ប្រកួតដល់១០៦លើក ឈ្នះ៨៥លើក ចាញ់១៧លើក និងស្មើ៤លើក ច្រើនជាងភាគីខាងកម្ពុជា ទើបលទ្ធផលឈ្នះរបស់កីឡាករកម្ពុជា មានការអបអរសាទរខ្លាំងក្លា ។ នៅក្នុងការប្រកួតនោះដែរកីឡាករសេក គឹមរួន ក៏បានទទួលជ័យជម្នះលើគូប្រកួតផងដែរ ដោយបានវាយថៃឲ្យសន្លប់ក្នុងទឹកទី១តែម្ដង ដោយគ្រាន់តែកីឡាករថៃមិនទាន់បានបញ្ចេញស្នៀតស្រួលបួលផង ក៏ត្រូវកីឡាករកម្ពុជាវាយឆ្មក់ឲ្យដួលខណៈអ្នកទស្សនាមិនទាន់ជក់ ភ្នែកប៉ុណ្ណោះ ។ កីឡាករសេក គឹមរួន ធ្លាប់ប្រកួត៧០លើក ឈ្នះ៥៨លើក និងចាញ់១២លើក ក្នុងពេលដែលកីឡាករថៃធ្លាប់ប្រកួត៥៦លើក ឈ្នះ៤៦លើក ចាញ់៩លើក និងស្មើ១លើកនៅលើសង្វៀន ។
ងាកទៅដល់ព្រឹត្តិការណ៍ប្រដាល់«កំពូលជើងឯករបស់ស្រាបៀរCambodia Beer» នៅរសៀលថ្ងៃអាទិត្យរបស់ទូរទស្សន៍អាស៊ីអាគ្នេយ៍នោះវិញ កីឡាករកម្ពុជា២រូប ដែលបានឡើងប្រកួតប្រដាល់អន្តរជាតិនាពេលនោះ ក៏ឈ្នះកីឡាករថៃទាំងពីរនាក់ដែរ ។ កីឡាករ យុគ យក្សផ្លែ មកពីក្លិបអប់រំកាយ និងកីឡាខេត្តបាត់ដំបង បានវាយកីឡាករថៃឈ្មោះ Pha Yanorn ឲ្យចាញ់ពិន្ទុក្នុងទឹកទី៥ និងកីឡាករកម្ពុជាឈ្មោះព្រំ សំណាង មកពីក្លិបកងទ័ពឆត្រយោង៩១១ ក៏វាយកីឡាករថៃឈ្មោះ Kamlai Phit ឲ្យចាញ់ដោយពិន្ទុដូចគ្នា ។ កីឡាករយុគ យក្សផ្លែ ធ្លាប់ប្រកួត១៤៣លើក ឈ្នះ១២៤លើក ចាញ់១៤លើក និងស្មើ៥លើក ក្នុងពេលដែលកីឡាករថៃប្រកួតបានតែ៩៣លើក ឈ្នះ៧៦លើក និងចាញ់១៧លើក អញ្ចឹងហើយទើបលទ្ធផលចាញ់របស់កីឡាករថៃ ហាក់មិនធ្វើឲ្យមានការកោតសរសើរចំពោះអ្នកឈ្នះ ។ ប៉ុន្តែសម្រាប់កីឡាករ ព្រំ សំណាង វិញហាក់ទទួលបានការសាទរខ្លាំងក្លា ដោយសារតែគេទើបតែបានប្រកួត៧៨លើក ឈ្នះ៦៧លើក ចាញ់៩លើក និងស្មើ២លើក ហើយអាចឈ្នះជើងខ្លាំងថៃធ្លាប់ប្រកួតបានដល់១០០លើក ឈ្នះ៧៩លើក ចាញ់១៩លើក និងស្មើ២លើកបាន ។ ទោះបីយ៉ាងណា លទ្ធផលឈ្នះរបស់ពួកគេក៏មើលទៅមានសភាពស្វិតស្វាញ និងវេទនាខ្លួនផងដែរ ៕
ប្រភព៖everyday
loading...
0 comments:
Post a Comment