ភ្នំពេញៈ ការប្រកួតកីឡាជាតិ លើកទី ១ ប្រចាំឆ្នាំ២០១៦ ដែលត្រូវបានស្ថាប័នជំនាញរបស់កម្ពុជា គឺគណៈកម្មាធិការជាតិអូឡាំពិកកម្ពុជា (NOCC) និងក្រសួងអប់រំ យុវជន និងកីឡា បានចាត់ទុកជាព្រឹត្តិការណ៍ប្រវត្តិសាស្រ្ត ដើម្បីរៀបចំខ្លួនធ្វើជាម្ចាស់ផ្ទះកីឡាស៊ីហ្គេម ឆ្នាំ ២០២៣ នោះ នឹងត្រូវប្រារព្ធពិធីបើកការប្រកួតនៅថ្ងៃសុក្រនេះ ក្រោមអធិបតីភាពលោកនាយករដ្ឋមន្រ្តី ហ៊ុន សែន។
ការរៀបក្បួនបើកកម្មវិធីប្រកួត ជាប្រវត្តិសាស្រ្តនេះ នឹងត្រូវបានរៀបចំឡើងដោយហ្មត់ចត់ ព្រោះវាបានឆ្លុះបញ្ចាំងឲ្យឃើញពីមុខមាត់របស់ប្រទេសជាតិ ខណៈភ្ញៀវជាតិ និងអន្តរជាតិ ថ្នាក់ដឹកនាំ មន្រ្តីរាជការ ស៊ីវិល និងតំណាងស្ថាប័នរាប់ពាន់នាក់ ត្រូវបានអញ្ជើញឲ្យចូលរួមហើយតារាកំប្លែងជើងចាស់លោក ព្រហ្ម ម៉ាញ រួមជាមួយតារាចម្រៀងមានឈ្មោះបោះសម្លេងលោក ព្រាប សុវត្ថិ កញ្ញា ឱក សុគន្ធកញ្ញា និងកញ្ញា ស៊ុន ស្រីពេជ្រ ក៏នឹងត្រូវចូលរួមបង្ហាញវោហារស័ព្ទ នឹងទឹកដមសំឡេងអបអរពិធីបើកនេះដែរ។
ចំណែកក្រុមចូលរួមសម្តែងរួមមានក្រុមកងយោធពលខេមរភូមិន្ទ ក្រុមល្បុក្កតោ ក្រុមវិទ្យាស្ថានជាតិអប់រំកាយ និងកីឡា ក្រុមសិល្បៈរបស់ក្រសួងវប្បធម៌ និងវិចិត្រសិល្បៈ អ្នកកាន់ភ្លើងគុប ក្រុមលោតឆត្រយោង រួមជាមួយអ្នកពាក់ព័ន្ធផ្សេងៗទៀត រាប់ពាន់នាក់ សុទ្ធតែត្រូវបានហៅឲ្យមកហាត់សម នៅពហុកីឡដ្ឋានជាតិខណៈការហាត់សមផ្តាច់ព្រ័ត្រ កាលពីថ្ងៃពុធ ត្រូវបានអ្នកគ្រប់គ្រងកម្មវិធីនេះ លើកឡើងថា ធ្វើបានល្អប្រសើរច្រើនហើយ គឺនៅមានចំណុចខ្វះខាតតិចតួច។
លោក វ៉ាត់ ចំរើន អគ្គលេខាធិការ NOCC បានថ្លែងកាលពីល្ងាចថ្ងៃពុធនោះថា៖ «ពិធីបើកការប្រកួតនេះ ត្រូវធ្វើឲ្យហ្មត់ចត់បំផុត ហើយនៅថ្ងៃនេះយើងបានហាត់សមផ្តាច់ព្រ័ត្រ ដោយមានការពិនិត្យ និងការណែនាំដោយផ្ទាល់ពីឯកឧត្តមបណ្ឌិត ថោង ខុន ដើម្បីធ្វើឲ្យចង្វាក់នៃការសម្តែងនីមួយៗ កាន់តែសុកឹតទៅៗ ប៉ុន្តែយើងនៅមានចំណុចខ្វះខាតតិចតួច»លោកបន្តថា៖ «ការប្រើភ្លើងពណ៌ និងសំឡេង បានល្អហើយ ចំណែកអ្នកសម្តែងគ្រប់ផ្នែកទាំងអស់ ក៏បានរៀបរយស្របតាមកម្មវិធីហើយដែរ គឺយើងគ្រាន់តែចាំកែលម្អចំណុចខ្វះខាតបន្តិចបន្តួច។ អ្នកហាត់សមទាំងអស់ មានការហត់នឿយហត់ខ្លាំង ព្រោះរយៈពេល ៣ ថ្ងៃនេះយើងហាត់សមរហូត ប៉ុន្តែដោយនេះជាកម្មវិធីជាតិ អ៊ីចឹងយើងត្រូវប្រឹងប្រែង ធ្វើយ៉ាងណាឲ្យបានល្អ ស្របតាមស្តង់ដារ ដែលយើងចង់បាន»។
តាមកម្មវិធីបើកការប្រកួតនេះ គឺជួបជុំទស្សនិកជន និងប្រតិភូរាជធានី-ខេត្ត ម៉ោង ៣:៣០ ហើយចាប់ពីម៉ោង ៤:៣០ ជាកម្មវិធីកម្សាន្ត ដោយមានអាយ៉ៃលោកព្រហ្ម ម៉ាញ ៣០ នាទី និងការច្រៀងរបស់លោក ព្រាប សុវត្ថិ កញ្ញា ឱក សុគន្ធកញ្ញា និង ស៊ុន ស្រីពេជ្រ ម្នាក់ ១ បទ។
ចំណែកលោកនាយករដ្ឋមន្រ្តី ហ៊ុន សែន នឹងអញ្ជើញមកដល់ម៉ោង ៥:៣០ បន្ទាប់មកចាប់ផ្តើមកម្មវិធី ដោយមានចម្រៀងកីឡា ១ បទ ការសម្តែងលោតឆត្រយោងនាំទង់ជាតិ ទង់កីឡាជាតិ និងទង់អូឡាំពិក រួចមានសម្តែងក្បាច់គុនកងយោធពលខ.ភ.ម និងក្រុមល្បុក្កតោ សម្តែងចលនាស្របអប់រំកាយ និងកីឡា សម្តែងទស្សនីយភាពសិល្បៈវប្បធម៌។
ក្រោយមកដង្ហែក្បួនព្យូហយាត្រាប្រតិភូកីឡា ដង្ហែទង់ជាតិ ទង់កីឡាជាតិ និងទង់អូឡាំពិក រួចធ្វើការគោរពទង់ជាតិ មុនពេលលោក ថោង ខុន និងលោក ហង់ ជួនណារ៉ុន ថ្លែងសុន្ទរកថា និងសុន្ទរកថាបើកការប្រកួតរបស់លោក ហ៊ុន សែន។ បន្ទាប់មកបាញ់កាំជ្រួច ២ នាទី មុនពេលតំណាងរបស់អត្តពលិក និងមន្រ្តីកីឡា ធ្វើសច្ចាប្រណិធាន រួចពិធីរត់ភ្លើងគុប និងដុតភ្លើងគុប (ទទួលភ្លើងកីឡាជាតិពីលោក ហ៊ុន សែន រួចរត់ដង្ហែជុំវិញទីលានបាល់ទាត់ ដោយអត្តពលិកល្បីៗមកដុតថាសភ្លើងគប់) និងបាញ់កាំជ្រួច ៥ នាទី បិទកម្មវិធី៕
ប្រភព៖ ភ្នំពេញប៉ុស្ត៏
loading...
0 comments:
Post a Comment