ឡានបត់ចូលខុនដូ ស្រាប់តែម៉ូតូបោលមកទាំងកំហឹង

រាជធានីភ្នំពេញ ៖ យុវជន២នាក់រងរបួសធ្ងន់ធ្ងរ ត្រូវបានរថយន្តសង្គ្រោះដឹកយកទៅព្យាបាលនៅមន្ទីរពេទ្យ ដោយសារតែជិះម៉ូតូឌុបគ្នាក្នុងល្បឿនលឿន មិនប្រយ័ត្នជ្រុលទៅបុករថយន្តស៊េររីទំនើបជនជាតិចិនម្នាក់ដែល បត់ឆ្វេង បំណងចូលក្នុងខុនដូ កាលពីវេលាម៉ោង១១ និង១៤នាទីយប់ថ្ងៃទី៣០ តុលា ស្ថិតនៅចំណុចមុខខុនដូ Bellevue តាមបណ្តោយផ្លូវមាត់ទន្លេ ត្រើយខាងកើតស្ថិត ក្នុងសង្កាត់ជ្រោយចង្វារ ខណ្ឌជ្រោយចង្វារ ។
ប្រភពព័ត៌មានពីកន្លែងកើតហេតុបានឱ្យដឹងថា គេឃើញរថយន្តម៉ាកឡង់គ្រីស្ស័រ ពណ៌ខ្មៅ ពាក់ស្លាកលេខភ្នំពេញ 2AX-1188 បើកតាមបណ្តោយផ្លូវមាត់ទន្លេ ក្នុងទិសដៅពីជើងទៅត្បូង លុះមកដល់កន្លែងកើតហេតុ បានបត់ឆ្វេងបំណងចូលក្នុងខុនដូ ស្រាប់តែមានយុវជន២នាក់ ជិះម៉ូតូម៉ាកហុងដាឌ្រីម ស៊េរីឆ្នាំ២០១៥ ពណ៌ខ្មៅ ពាក់ស្លាកលេខភ្នំពេញ 1CW-9656 ជិះឌុបគ្នាមកពីក្រោយ ក្នុងល្បឿនយ៉ាងលឿន បានបុករថយន្តចំពីចំហៀងពេញទំហឹង បណ្តាលរងរបួសធ្ងន់ធ្ងរទាំង២នាក់ ហូរឈាមស្រោចពេញខ្លួន ត្រូវបានរថយន្តសង្គ្រោះដឹកយកទៅព្យាបាលនៅមន្ទីរពេទ្យភ្លាមៗ ។
បើតាមជនរងគ្រោះបានបន្ថែមទៀតថា រថយន្តរបស់ជនជាតិចិនខាងលើ ពេលបត់មិនមានស៊ីញ៉ូប្រាប់ជាមុនទេ គាប់ជួន រូបគេនិងមិត្តភក្តិជិះម៉ូតូមកពីក្រោយរាងលឿនបន្តិចផងនោះ ក៏ជាន់ហ្វ្រាំងគេចបណ្តាលឱ្យជ្រុលទៅបុកជញ្ជាំងតែម្តងទៅ ។
ក្រោយពេលកើតហេតុ សមត្ថកិច្ចមូលដ្ឋានបានទៅដល់កន្លែងកើតហេតុ ធ្វើការវាស់វែងយករថយន្ត និងម៉ូតូទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ និងហៅម្ចាស់រថយន្តទៅប៉ុស្តិ៍ ដើម្បីធ្វើការសួរនាំ ។