ពុទ្ធោ ! កិន​ពី​ខ្នង​ដល់​ក្បាល​បែកធ្លាយ​ខួរ

ពុទ្ធោ ! កិនពីខ្នងដល់ក្បាលបែកធ្លាយខួរ

រាជធានីភ្នំពេញ ៖ បុរសម្នាក់ត្រូវបានគេប្រទះឃើញដេកស្លាប់ក្នុងថ្លុកឈាមដោយមាន ស្នាមកង់រថយន្តជាប់នឹងខ្លួនតាំងពីខ្នងដល់ក្បាលបែកធ្លាយខួរ និងមានម៉ូតូ១គ្រឿងនៅក្បែរផងបង្កឲ្យមានការភ្ញាក់ផ្អើលកាលពីវេលា ម៉ោង១១ និង៤០នាទីយប់ថ្ងៃទី៣១ ខែកញ្ញា ឆ្នាំ២០១៦ នៅចំណុចមុខរោងចក្រប៊ឺរី តាមបណ្តោយផ្លូវទំនប់កប់ស្រូវ ស្ថិតក្នុងភូមិជម្ពូរវ័ន សង្កាត់ចោមចៅ ខណ្ឌពោធិ៍សែនជ័យ ។
ជនរងគ្រោះមានឈ្មោះ បន តុលា ភេទប្រុស អាយុ២៤ឆ្នាំ មុខរបរអ្នកបើកបររថយន្ត ស្នាក់នៅផ្ទះជួលក្នុងភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ មានស្រុកំណើតនៅភូមិល្បើក ឃុំម្រាម ស្រុករមាសហែក ខេត្តស្វាយរៀង ។ ម៉ូតូដែលនៅក្បែរជនរងគ្រោះម៉ាក MSX ពណ៌ក្រហម ពាក់ស្លាកលេខ ភ្នំពេញ 1CN-9943 ធ្វើដំណើរតាមបណ្តោយផ្លូវទំនប់កប់ស្រូវក្នុងទិសដៅពីត្បូងទៅជើង ។
ប្រជាពលរដ្ឋនៅកន្លែងកើតហេតុបានឲ្យដឹងថា បន្ទាប់ពីមានអ្នកដំណើរបានជិះឆ្លងកាត់ផ្លូវខាងលើបានប្រទះឃើញជន រងគ្រោះដេកផ្កាប់មុខបែកក្បាលធ្លាយខួរហើយជើងម្ខាងនៅជាប់ក្រោម ម៉ូតូស្លាប់នៅក្នុងថ្លុកឈាម ក៏បានរាយការណ៍ទៅសមត្ថកិច្ចចុះមកមើលដល់ចំណុចកើតហេតុធ្វើការ ឆែកឆេរកមើលអត្តសញ្ញាណប័ណ្ណព្រមទាំងលេខទូរស័ព្ទទំនាក់ទំនងរកក្រុម គ្រួសារ ។
ក្រោយពេលកើតហេតុ សពត្រូវបានសមត្ថកិច្ចខណ្ឌពោធិ៍សែនជ័យបានចុះទៅពិនិត្យមើលភិនភាគ សពឃើញមានស្នាមកង់រថយន្តកិនជាប់ពីលើខ្នងឡើងមកលើក្បាលបណ្តាល ឲ្យស្លាប់ហើយរថយន្តបើករត់គេចបាត់ស្រមោល ។ សពសមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីនៅ ស្រុកកំណើត ចំណែកម៉ូតូត្រូវបានជំនាញចរាចរណ៍ខណ្ឌពោធិ៍សែនជ័យយកទៅរក្សាទុក ដើម្បីរង់ចាំមានឯកសារត្រូវនឹងប្រគល់ឲ្យវិញ ៕