ដំណើរកាត់ព្រៃព្រឹក្សាទៅកាន់ទឹកធ្លាក់កោះរ៉ុង

ដោយធ្វើដំណើរតាមផ្លូវទឹកពីឆ្នេរអូរឈើទាលនៃក្រុងព្រះសីហនុឆ្ពោះទៅកាន់រមណីយដ្ឋានកោះរ៉ុង ឆ្នេរកោះតូចគឺជារមណីយដ្ឋានធម្មជាតិមួយដ៏ស្រស់បំព្រងដែលមានឆ្នេរខ្សាច់ដ៏សក្បុស។ ភ្ញៀវទេសចរភាគច្រើនជាជនជាតិបរទេសដែលចង់ទៅលម្ហែកាយលើឆ្នេរធម្មជាតិស្អាតដូចផ្ទាំងគំនូរគេចចេញពីសំឡេងអ៊ូអរ។
ខណៈពេលភ្ញៀវបរទេសរីករាយជាមួយនឹងការគេងសំដិលថ្ងៃលើឆ្នេរ មុជទឹកមើលផ្កាថ្មក្នុងផ្ទៃសមុទ្រពណ៌ខៀវស្រងាត់ និងពិសាភេសជ្ជៈគ្រប់ប្រភេទនៅតាមបារ៍ក្បែរកំពង់ផែនឆ្នេរកោះតូច រមណីយដ្ឋានទឹកធ្លាក់ក្នុងព្រៃស្រោងលើដែនកោះហាក់មិនទទួលបានការពេញនិយមពីភ្ញៀវទេសចរប៉ុន្មានទេ ជាពិសេសភ្ញៀវខ្មែរតែម្ដង។
ក្រោយពីចូលចតនៅកំពង់ផែឆ្នេរកោះតូច ក្រុមទេសចរខ្មែរដែលស្រឡាញ់ និងចង់ឃើញសម្បត្ដិធម្មជាតិរបស់ជាតិខ្លួន នោះ បាននាំគ្នាបន្ដដំណើរពីកំពង់ផែឆ្លងកាត់ឆ្នេរវែង ឆ្ពោះទៅឆ្នេរ សុខសាន្ដ ដែលមានរយៈពេលជិត ១ ម៉ោងតាមកាណូតលឿន និងជាង ២ ម៉ោងតាមកាណូតធម្មតា។ ចំពោះកាណូតលឿនមានតម្លៃ ២០ ដុល្លារក្នុងម្នាក់ទាំងទៅ ទាំងមក ហើយចំពោះកាណូតធម្មតាមានតម្លៃ ១៥ ដុល្លារ។
បើអ្នកខ្លាចរលក និងមិនចេះហែលទឹក អាចធ្វើដំណើរតាមផ្លូវគោកដោយដើរកាត់ព្រៃ។ ការដើរថ្មើរជើងនេះមិនមែនជារឿងលេងសើចទេ នៅលើផ្លូវតូច ឡើងចំណោត និងថ្មរដិបរដុបដែលត្រូវចំណាយពេលជាង ១ ម៉ោង។
ក្រុមទេសចរកម្ពុជាដែលទទួលបានព័ត៌មានពីអ្នកនេសាទអំពីទឹកធ្លាក់នៅចម្ងាយប្រមាណ ៣០០ ទៅ ៤០០ ម៉ែត្រនោះ បាននាំគ្នាដោះអាវវែង និងខោវែងដាក់ចូលកាបូបស្ពាយដើម្បីសម្រួលដល់ដំណើរឡើងភ្នំ។
លោក នុល ចំរុង អាយុ ២៥ ឆ្នាំ ជាអ្នកទស្សនាធម្មជាតិលើកោះរ៉ុង បាននិយាយថា៖ «ចម្ងាយផ្លូវតែបីបួនរយម៉ែត្រទេ ប៉ុន្ដែវាហាក់ដូចឆ្ងាយគ្រាន់បើ ពីព្រោះពួកយើងត្រូវដើរឡើងភ្នំរដិបរដុប និងឆ្លងកាត់ទឹក។ បើគ្មានអ្នកនាំផ្លូវទេ [អ្នកនេសាទ] យើងរកប្រភពទឹកនោះមិនឃើញឡើយ!»។
នៅពេលដើរឆ្លងកាត់ទឹកត្រឹមស្មងជើង ភ្ញៀវទេសចរមួយក្រុមនេះ បានបង្ហាញនូវភាពរីករាយយ៉ាងខ្លាំងដោយខ្លះខំរត់ត្របាញ់លើទឹក ខ្លះឡើងជិះកគ្នា ហើយខ្លះទៀត ឈរថតរូបយ៉ាងរំភើយហាក់គ្មានអារម្មណ៍នឿយហត់សោះឡើយ។
យុវជនរូបនេះ បានបន្ដថា៖ «យើងមិននឿយហត់ បើទោះជាយើងត្រូវដើរឡើងភ្នំ និងកាត់ទឹកដ៏លំបាកយ៉ាងណាក៏ដោយ។ សម្រស់ព្រៃភ្នំ ទឹកសមុទ្រ និងទឹកធ្លាក់ពិតជាធ្វើឲ្យពួកយើងបាត់ភាពហេវហត់អស់កម្លាំងរលីងហើយ»។
ក្រោយពីងូតទឹកធ្លាក់រិញៗ នៅរដូវប្រាំងដ៏ត្រជាក់នោះ លោក ចំរុង បានឆ្លៀតមកប្រាប់បន្ដថា៖ «ទិដ្ឋភាពនេះពិតជាប្លែកភ្នែកខ្លាំងណាស់ ហើយនឹកស្មានមិនដល់ថា ធម្មជាតិស្រុកខ្មែរពិតជាស្អាតដល់ថ្នាក់នេះសោះ»។
លោកបានបន្ថែមថា៖ «ខ្ញុំពិតជានឹកស្មានមិនដល់មែន។ ប៉ុន្ដែខ្ញុំសូមឲ្យវានៅតែស្អាតដរាបទៅ ដោយសារតែទីនេះមិនទាន់មានមនុស្សច្រើនទៅដល់ ទើបវាមិនទាន់ត្រូវបានបំផ្លាញ។ សូមជួយថែរក្សាបរិស្ថានទាំងអស់គ្នា»។
នៅពេលការងូតទឹកកម្សាន្ដបានបញ្ចប់ ក្រុមទេសចររបស់លោក ចំរុង បានវិលមកកាន់ឆ្នេរកោះតូចវិញដើម្បីទទួលទានអាហារពេលល្ងាច និងសម្រាកមួយរាត្រីនៅផ្ទះស្នាក់លើឆ្នេរដែលមានប្រមាណ ១៥ កន្លែង និងមានតម្លៃចាប់ពី ៣០ ទៅ ៥០ ដុល្លារសម្រាប់ បឹងកាឡូ ហើយប្រមាណ ២៥ ដុល្លារសម្រាប់ផ្ទះសំណាក់ធម្មតា។
លោក នូ សុផល ប្រធានមន្ទីរទេសចរណ៍ខេត្ដព្រះសីហនុ បានឲ្យដឹងថា នៅលើកោះរ៉ុងនេះ មានទឹកធ្លាក់តែមួយកន្លែងទេ គឺទឹកធ្លាក់សុខសាន្ដដែលហូររិញៗពីស្ទឹងតូចខាងលើ។
លោកទទួលស្គាល់ថា ចំពោះការធ្វើដំណើរផ្លូវគោកពីឆ្នេរកោះតូចទៅកាន់ឆ្នេរវែងពិតជាមានការលំបាកប្រាកដមែន។ ប៉ុន្ដែ ថ្មីៗនេះ ក្រុមហ៊ុនរ៉ូយ៉ាល់គ្រុបកំពុងរៀបចំត្រួសត្រាយផ្លូវឲ្យក្រុមផលិតកម្ម Survivor មានលទ្ធភាពងាយស្រួលចូលថតទិដ្ឋភាពនានាលើកោះដើម្បីផ្សព្វផ្សាយពីសក្ដានុពលទេសចរណ៍លើ កោះរ៉ុង។
ប្រធានមន្ទីរទេសចរណ៍ លោក នូ សុផល បានបន្ដថា៖ «ភាពទាក់ទាញបំផុតសម្រាប់កោះរ៉ុងគឺឆ្នេរសមុទ្រដ៏ស្រស់ស្អាត និងការបម្រើសេវាកម្មល្អ»។
យោងតាមលោក វណ្ណៈ អាយុ ២៥ ឆ្នាំ ជាអ្នកទទួលភ្ញៀវនៅ Island Palace Bungalow បានឲ្យដឹងថា នៅលើកោះរ៉ុងនេះ មានទឹកធ្លាក់ ២ កន្លែង ដែលមួយនៅក្បែរឆ្នេរកោះតូចចម្ងាយប្រមាណ ១០០ ម៉ែត្រពី Island Palace និងមួយទៀតនៅភូមិសុខសាន្ដនេះតែម្ដង។
ទាក់ទិននឹងរដូវកាលដ៏សមស្របក្នុងការងូតទឹកជ្រោះ លើកោះ លោកបន្ដថា៖ «ជាទូទៅ ភ្ញៀវមកលេងទឹកធ្លាក់ទាំងនេះនៅរដូវភ្លៀង ជាពិសេសបុណ្យភ្ជុំបិណ្ឌ ដោយសារតែសម្បូរទឹកច្រើនហូរច្រោះថ្មស្អាត»៕