ជីវិតដូចស្លាប់ដូចសត្វធាតុ… បងប្រុសបាត់បង់ជីវិត ប្អូនស្រីបាក់ជើង អ្នកបុករត់បាត់

ភ្នំពេញ ៖ បុរសម្នាក់ ស្លាប់ភ្លាមៗនៅកន្លែង ចំណែកនារីម្នាក់ទៀត រងរបួសបាក់ជើងឆ្វេង បែកមាត់ បន្ទាប់ពីរថយន្តបែនដឹកខ្សាច់ កង់៦បើកបុកមូ៉តូ កាលពីវេលាម៉ោង ៤និង២០នាទីរសៀល ថ្ងៃទី២៤ ខែកញ្ញា ឆ្នាំ២០១៦ ស្ថិតនៅលើកំណាត់ ផ្លូវជាតិលេខ៣ ភូមិព្រៃកី សង្កាត់ភ្លើងឆេះរទេះ ខណ្ឌពោធិ៍សែនជ័យ ក្រោយកើតហេតុ រថយន្តបង្កបើករត់គេចទៅបាត់ ។
ជនរងគ្រោះ ស្លាប់នៅកន្លែង មានឈ្មោះ នឹម បុ៊នលី ភេទប្រុស អាយុ២៥ឆ្នាំ មុខរបរ កម្មកររោងចក្រ ស្នាក់នៅផ្ទះជួល ភូមិព្រៃទា សង្កាត់ចោមចៅ មានស្រុកកំណើតភូមិ ក្រាំងកណ្តាល ឃុំស្នំក្រពើ ស្រុកគងពិសី ខេត្តកំពង់ស្ពឺ ។ ចំណែកនារីម្នាក់ទៀត រងរបួសធ្ងន់ ត្រូវជាបងប្អូនជីដូនមួយនឹងគ្នា មានឈ្មោះ ខាត់ ចាន់រី អាយុ១៨ឆ្នាំ មុខរបរកម្មកររោងចក្រ ស្នាក់នៅផ្ទះជួលជាមួយគ្នា មានស្រុកកំណើត ភូមិក្រាំងកណ្តាល ឃុំ ស្នំក្រពើ ស្រុកគងពិសី ខេត្តកំពង់ស្ពឺ ។
ជនរងគ្រោះ២នាក់បងប្អូន ជិះមូ៉តូមួយគ្រឿង ម៉ាកហុងដា សេ១២៥ សេរី២០១៥ ពណ៌ខ្មៅ ពាក់ស្លាកលេខ ភ្នំពេញ 1FC-2130 ដោយឈ្មោះ នឹម បុ៊នលី ជាអ្នកបើកបរ ។
តាមប្រភពនៅកន្លែងកើតហេតុ បានឲ្យដឹងថា មុនកើតហេតុ គេឃើញជនរងគ្រោះ២នាក់ បងប្អូនជិះមូ៉តូ ឌុបគ្នាពីជើងទៅត្បូង លុះដល់ចំណុចកើតហេតុ ស្រាប់តែមានរថយន្តបែនកង់៦ ពណ៌ស បើកពីត្បូងទៅជើង ច្រាសទិសគ្នាជ្រុល មកបុកពេញទំហឹង បណ្តាលឲ្យដួល កិនពីលើបុរស ជាអ្នកបើកបរមូ៉តូ ចំណែកប្អូនស្រីម្នាក់ទៀត ផ្លោងខ្ទាតធ្លាក់ ចូលទៅក្នុងប្រឡាយ រងរបួសបាក់ជើងឆ្វេង ។
ក្រោយកើតហេតុភ្លាមៗ រថយន្តបង្ក បើករត់គេចទៅបាត់ បន្សល់ទុកជនរងគ្រោះ ម្នាក់ស្លាប់ភ្លាមៗនៅកន្លែង និងម្នាក់ទៀត រងរបួសធ្ងន់ ត្រូវបានរថយន្តសង្រ្គោះ ដឹកបញ្ជូនទៅមន្ទីរពេទ្យព្រះកុសុមះ ។
តាមសាច់ញាតិ បានឲ្យដឹងថា ជនរងគ្រោះទាំង២នាក់ ស្នាក់នៅ ផ្ទះជួលក្នុងភូមិព្រៃទា សង្កាត់ចោមចៅ តែដោយសារ ពេលទំនេរពីការងារ ចុងសប្តាហ៍ បាននាំគ្នាទៅស្រុកកំណើត លុះទើបតែដល់ ចំណុចខាងលើ ក៏ជួបនូវឧប្បត្តិហេតុគ្រោះថ្នាក់ចរាចរណ៍ អាក្រក់នេះតែម្តង ។សាកសពក្រោយកើតហេតុ ត្រូវបានសមត្ថកិច្ច ស្រាវជ្រាវរកសាច់ញាតិ មកដឹកសាកសពយកទៅធ្វើបុណ្យ តាមប្រពៃណីឯស្រុកកំណើត ។ ដោយឡែកម៉ូតូ ត្រូវបានសមត្ថកិច្ចរកទៅរក្សាទុក នៅផ្នែកជំនាញ រងចាំស្រាវជ្រាវបរករថយន្តបង្ក ៕