ចិនចាប់សម្រុកបោសសម្អាតអំពើពុករលួយក្នុង ជួរកងទ័ព។ តាមកាសែតរដ្ឋចិន China Daily ចុះផ្សាយនៅថ្ងៃសុក្រនេះ គណៈកម្មការ មជ្ឈឹមយោធាបានបង្កើតក្រុមអធិការកិច្ចមួយ ដើម្បីប្រយុទ្ធប្រឆាំងសកម្មភាពពុករលួយ នៅក្នុងវិស័យការពារជាតិ។ នេះជាលើកទី១ ដែលឧត្តមបញ្ជាការយោធា ដែលស្ថិតនៅក្រោមការដឹកនាំរបស់លោកប្រធានាធិបតីស៊ី ជីនពីង សម្រេចបង្កើតក្រុមត្រួតពិនិត្យ អំពើពុករលួយ របស់មន្រ្តីយោធាចិន។
ការប្រកាស បង្កើតក្រុមអធិការកិច្ចប្រឆាំងអំពើពុករលួយ នៅក្នុងជួរកងទ័ពចិន កើតមាននៅក្រោយពេលដែលមានដំណឹងថា ប្រធានាធិបតីចិន លោកស៊ី ជីនពីងកំពុងចង់ពង្រឹងអំណាចរបស់លោកទៅលើកងទ័ពរំដោះប្រជាជន ដែលជាស្ថាប័នដ៏មានអំណាចកំពូល នៅក្នុងប្រទេសចិន។តាមកាសែតប្រចាំថ្ងៃចិន China Daily ដែលបានដកស្រង់សំដីរបស់មន្រ្តីយោធាចិន ចំណាត់ការថ្មីនេះមានគោលដៅ បោសសម្អាតអំពើពុករលួយនៅក្នុងជួរកងទ័ព។ តាំងពីចូលកាន់តំណែងជាប្រធានាធិបតីចិន លោកស៊ី ជីនពីងបានសន្យា និងបើកយុទ្ធនាការប្រយុទ្ធប្រឆាំងអំពើពុករលួយ តាំងពីថ្នាក់លើ ដល់ថ្នាក់ក្រោម មិនថា ខ្លា ឬសត្វរុយ។
កាលពីខែវិច្ឆិកាកន្លងទៅ លោកប្រធានាធិបតី ស៊ី ជីនពីង ដែលជាប្រធានគណៈកម្មការមជ្ឈឹមយោធា ក៏ធ្លាប់បានសន្យាផ្តល់អំណាច និងឯករាជ្យភាពច្រើនជាងមុន ដល់ក្រុមអង្គភាពដែលត្រូវមានបេសកកម្មត្រួតពិនិត្យអំពើពុករលួយ។ កន្លងមក ក្រុមអធិការកិច្ចសម្រាប់ប្រយុទ្ធប្រឆាំងអំពើពុករលួយ ក្នុងជួរកងទ័ព រមែងត្រូវបង្កើតឡើងដោយស្ថាប័នយោធាថ្នាក់មូលដ្ឋាន។ ប៉ុន្តែ ដោយសារខ្វះឯករាជ្យភាព ក្រុមនេះមិនអាចធ្វើការដោយប្រសិទ្ធិភាពដើម្បីចាប់កំហុសអំពើពុករលួយ របស់មន្រ្តីយោធាចិនបានឡើយ។
តាមលោកសុង ចុងភីង អ្នកជំនាញខាងផ្នែកយោធាចិន ក្រុមអធិការកិច្ច ដែលបង្កើតឡើងដោយគណៈកម្មការកណ្តាលយោធាចិន នឹងធ្វើការម៉ត់ចត់ និងអាចប្រយុទ្ធប្រឆាំង អំពើពុករលួយដោយប្រសិទ្ធិភាពបំផុត។ តាមកាសែតGlobal Times ដែលបានស្រង់សំដីរបស់លោកសុង ចុងភីង ដើម្បីបញ្ជាក់ពីភាពស្អាតស្អំ មិនលំអៀង និងដើម្បីជៀសវាងការឃុបឃិត មន្រ្តីអធិការកិច្ចប្រយុទ្ធប្រឆាំងអំពើពុករលួយនៅក្នុងជួរកងទ័ពនឹង ត្រូវតែងតាំងថ្មី នៅពីបីឆ្នាំម្តង។
តាមកាសែតរដ្ឋចិន ក្រុមអធិការកិច្ចដែលទើបត្រូវតែងតាំងថ្មីៗដោយគណៈកម្មការមជ្ឈឹមយោធា នឹងចេញទៅធ្វើការនៅតាមនាយកដ្ឋានចំនួន១៥ និងនៅទីស្នាក់ការកណ្តាលថ្នាក់តំបន់របស់ក្រសួងការពារជាតិចិន។ នៅរយៈពេល៣ឆ្នាំចុងក្រោយនេះ មន្រ្តីយោធាជាន់ខ្ពស់ចិន ប្រមាណ ៥០នាក់ ត្រូវបានស៊ើបអង្កេត ឬចោទប្រកាន់ក្នុងបទប្រព្រឹត្តអំពើពុករលួយ។ នៅប្រទេសចិន ដើម្បីផលប្រយោជន៍ផ្ទាល់ខ្លួន មន្រ្តីយោធាមួយចំនួន ធំបានយកតួនាទីរបស់ខ្លួន ទៅធ្វើជំនួញផ្នែកអចលនទ្រព្យ ទូរគមនាគមន៍ ឬផ្នែកសុខភាព។ ដើម្បីទប់ស្កាត់អំពើពុករលួយរបស់មន្រ្តីយោធា អាជ្ញាធរចិន កាលពីខែមីនាកន្លងទៅ បានបញ្ជាហាមលែងឲ្យមានការដាក់ដេញថ្លៃ លើសេវា ហើយនិងការធ្វើពាណិជ្ជកម្មក្នុងរយៈពេល ៣ឆ្នាំ៕
ប្រភព៖POSTNEWS
loading...
0 comments:
Post a Comment