បណ្តាំ3ថ្ងៃមុនស្លាប់កុំបូជាឬបញ្ចុះចាំ7ថ្ងៃរស់វិញ ថ្ងៃទី5មានរឿងចម្លែកកើតលើថ្ងាសរបស់សព

ខេត្តស្វាយរៀង ៖ រឿងចម្លែកមួយបានធ្វើឱ្យអ្នកភូមិជង្រុក ឃុំរមាំងថ្កោល ស្រុកស្វាយទាប ភ្ញាក់ផ្អើលគ្រប់គ្នា ដោយសារតែបុរសម្នាក់បានដឹងខ្លួនមុនថានឹងស្លាប់ ដោយបាននិយាយប្រាប់ប្រពន្ធ៣ថ្ងៃមុនស្លាប់ថា « ពេលដែលខ្ញុំស្លាប់កុំយកសពខ្ញុំទៅបូជា ឬបញ្ចុះឲ្យសោះ បើសពនៅធម្មតា មិនរឹង មិនហើម ឬមិនស្អុយ រង់ចាំឱ្យគ្រប់៧ថ្ងៃ ព្រលឹងខ្ញុំនឹងវិលមកចូលរូបរាងកាយវិញហើយ » ។
បណ្ដាំបានបីថ្ងៃក្រោយមក គាត់ក៏បានស្លាប់មែន នៅថ្ងៃទី០៦ តុលា ប្រពន្ធមិនព្រមយកសពប្តីទៅបូជាឬបញ្ចុះឡើយ ដោយគោរពតាមបណ្ដាំ ។ រហូតមកដល់ថ្ងៃទីប្រាំ ត្រូវនឹងថ្ងៃសុក្រទី៧ តុលា ២០១៦នេះ ស្រាប់តែកើតរឿងចម្លែកបែកញើសនៅលើថ្ងាស់នៃសពបុរសខាងលើ ហើយមានផុសជាអក្សរនៅលើថ្ងាស់ទៀត មុនដំបូងស្មានថា ជាអក្សរ ដែលចារពេលនៅរស់ តែក្រោយមកអក្សរដែលផុសនោះ ជាពាក្យបាលីថា «ពុទ្ធាយៈ» ពេលមានមនុស្សផ្សេងទៀតទៅឱនមើល ក៏បាត់អក្សរ ពុទ្ធាយៈ បែរជាឃើញពាក្យថា «បំណន់» ពេលមានមនុស្សមើលច្រើន ស្រាប់តែរលប់ពាក្យ បំណន់ ឃើញតែតួអក្សរ បីតួ គឺ អក្សរ (ប. ណ. ប.) ទៅវិញ ធ្វើឲ្យអ្នកភូមិកាន់តែងើយឆ្ងល់ និងមានការភ្ញាក់ផ្អើលយ៉ាងខ្លាំង ហើយចាស់ទុំក៏បានអញ្ជើញយាយជី តាជី មករៀបចំសិក្ខារបូជាថ្វាយ និងបែបន់ បារមី វត្ថុសក្តិសិទ្ធជួយថែរក្សា ដើម្បីបញ្ជូនព្រលឹងវិញ្ញាណប្រាស់ឋាន ឲ្យមកចូលរូបរាង្គកាយវិញ តាមបណ្តាំរបស់ប្តីដែលផ្តាំប្រពន្ធថា «ព្រះអង្គដកយកព្រលឹងឲ្យទៅរៀន០៧ថ្ងៃឲ្យប្រលឹងមកចូលរូបវិញ»។
សូមបញ្ជាក់ថា ហេតុការណ៍ចម្លែកនេះ បានធ្វើឲ្យមានការភ្ញាក់ផ្អើលដល់អ្នកភូមិនាំគ្នាទៅចោមរោមមើលសាកសព និងរង់ចាំមើល ថាតើបុរសខាងលើ ដែលស្លាប់ទៅហើយនោះ អាចរស់ឡើងវិញមែនដែរឬទេ ?
បើតាមស្ត្រីជាប្រពន្ធឈ្មោះ ឡាយ សុធី អាយុ៥៣ឆ្នាំ បានរួមរស់ជាមួយប្តីរយះពេល៦ឆ្នាំហើយ ចាប់តាំងពីឆ្នាំ២០១០ ដល់ឆ្នាំ២០១៦ នេះ ហើយនៅមុនថ្ងៃដែលប្តីរបស់គាត់ស្លាប់៣ថ្ងៃ បាននិយាយប្រាប់គាត់ជាប្រពន្ធថា ពេលគាត់ស្លាប់សូមកុំយកសពរបស់គាត់ទៅបញ្ចុះឬបូជា ពីព្រោះរូបគាត់(ជាប្តី) ត្រូវព្រះអង្គយកព្រលឹងទៅរយៈពេល៧ថ្ងៃ ទើបព្រលឹងរបស់គាត់វិលមកចូលរូបរាងកាយវិញ ។
ប្រភពខាងលើបានបន្តទៀតថា ប្តីរបស់គាត់បានស្លាប់នៅវេលាម៉ោង១១និង១០នាទីយប់ថ្ងៃទី៣ តុលា ដែលរហូតមកដល់ថ្ងៃទី៦ តុលា គឺស្លាប់បាន៣យប់៤ថ្ងៃហើយ រូបគាត់នឹងសង្ឃឹមថា ប្តីរបស់គាត់នឹងរស់ឡើងវិញ ។
ដោយឡែកបើតាមប្រភពព័ត៌មានពីសាច់ញាតិនៃសពបានឲ្យដឹងផងដែរថា នាពេលកន្លងមកអ្នកដែលស្លាប់នេះ ធ្លាប់បានទៅបួសរៀនមន្តអាគមគាថា នៅភ្នំគូលែន ខេត្តសៀមរាប ជាមួយអ្នកសច្ចំ ហើយការស្លាប់នេះ អាចបណ្តាលមកពីខុសគ្រូបាធ្យាយ ។
តាមប្រភពថា ពេលនេះគ្រូធំនៅឯភ្នំគូលែននោះ តែងតែទូរស័ព្ទមកប្រាប់ក្រុមគ្រួសារនៃសពថា កុំអាលបូជាឬបញ្ចុះសពអី រង់ចាំ៧ថ្ងៃក្រោយ ព្រលឹងនឹងវិលចូលរូបរាងកាយវិញហើយ ។ ទោះបីជាយ៉ាងណាក៏ដោយ រឿងនេះជារឿងអបីយជំនឿសុទ្ធសាធ ហើយរឿងចម្លែកនេះ គឺបានត្រឹមរង់ចាំមើលទាំងអស់គ្នា ថាតើលទ្ធផលទៅជាយ៉ាងណា ? ម្នាក់ៗនៅកំដរសពរង់ចាំមើល ។
បើតាមក្រុមគ្រួសារបានឲ្យដឹងទៀតថា មកដល់ម៉ោង២រសៀលថ្ងៃទី៦ តុលា សពនៅមានសភាពទន់ធម្មតា ដូចជាមនុស្សដេកលក់ ពុំទាន់ប្រែប្រួលរឹង ឬហើមនោះឡើយ ។ រីឯចាស់ទុំខ្លះនិយាយថា អ្នកស្លាប់ទំនងជាមិនទាន់ស្លាប់ទេ គឺគ្រាន់តែភ្លឹកប៉ុណ្ណោះ បើស្លាប់អាចហើមហើយ ។ ម្យ៉ាងអ្នកស្លាប់ពុំមានជម្ងឺអ្វីទេ មុនពេលស្លាប់គឺចូលដេកជាធម្មតា ហើយក៏ស្រាប់តែលែងដកដង្ហើមតែម្តង ទើបស្ត្រីជាប្រពន្ធគិតថា ប្តីមិនទាន់ស្លាប់ និងមិនព្រមយកសពប្តីទៅបូជា ឬបញ្ចុះដោយរង់ចាំ៧ថ្ងៃតាមបណ្តាំប្តី ថាព្រលឹងនិងវិលមកចូលរូបរាងកាយវិញ ។ ក៏ប៉ុន្តែក្រុមគ្រួសារ ក៏បានអញ្ជើញលោកតាអាចារ្យមកសូត្រមន្តរាល់ថ្ងៃ និងនិមន្តព្រះសង្ឃមកសូត្រមន្តធ្វើបុណ្យ និងដោតទង់ស (ទង់ក្រពើ) បង្ហាញថា មនុស្សស្លាប់ ក៏ប៉ុន្តែមិនព្រមឲ្យយកសពទៅបូជាឬបញ្ចុះទេ ដោយនៅទ្រាំកំដររង់ចាំ៧ថ្ងៃសិន ដើម្បីតាមដានសភាពសពតើប្រែប្រួល រឹងហើម ឬយ៉ាងណា ?
នេះមិនមែនជាលើកទីមួយទេការរក្សាទុកសពអ្នកស្លាប់បែបនេះ តែងកើតមានជារឿយៗ ដែលពេលខ្លះហែដល់ប៉ាឆា ក៏ហែមកផ្ទះវិញ ទីបំផុតខ្លះរហូតមានដង្កូវវាចេញពីរន្ធច្រមុះ ទើបអស់ចិត្តថាស្លាប់ ក៏នាំទៅបូជា ។
ក្នុងលោកនេះអ្នកស្លាប់ គឺស្លាប់ហើយ មិនអាចរស់វិញនោះទេ ប៉ុន្តែចាំមើលឱ្យអស់ចិត្តសិន ។ ទោះជាយ៉ាងណាក៏ដោយ កោះសន្តិភាពនៅតាមដានបន្តនឹងចុះផ្សាយនៅលេខក្រោយទៀត ៕