អីក៏តណ្ហាម្ល៉េះ! ចាប់កូនក្រមុំគេក្នុងបុណ្យកឋិន ដឹកតាមម៉ូតូលាក់ក្នុងផ្ទះជួល

រាជធានីភ្នំពេញ ៖ សេចក្តីរាយការណ៍បានឱ្យដឹងថា មានការភ្ញាក់ផ្អើលមួយ ដោយនារីក្រមុំម្នាក់បានរត់ចេញបន្ទប់ផ្ទះជួលមួយកន្លែង ហើយស្រែកឱ្យគេជួយនាង កាលពីវេលាម៉ោងជាង០៩ព្រឹកថ្ងៃទី០២ វិច្ឆិកា ២០១៦ នេះ ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ ដោយសារយុវជនម្នាក់ប៉ងចាប់រំលោភនាង តែរើបំរះរត់ចេញទាន់ ហើយត្រូវពលរដ្ឋក្នុងភូមិ នាំគ្នារត់មកជួយ និងឃាត់បានជននោះតែម្តង ។
ប្រភពឱ្យដឹងថា ជនសង្ស័យឈ្មោះគុណ កក្កដា អាយុ២២ឆ្នាំ ជាអ្នកឃ្វាលគោ និងច្រូតស្មៅ មានទីលំនៅក្នុងភូមិព្រៃព្រិច ឃុំវាលពន់ ខេត្តកំពង់ស្ពឺ ។ ចំណែកឯនារីរងគ្រោះអាយុ១៦ឆ្នាំ (ទាំង២នាក់ត្រូវអះអាងថា មិនដែលស្គាល់គ្នាពីមុនមកទេ) ។
បើតាមនារីរងគ្រោះឱ្យសមត្ថកិច្ចដឹងថា កាលរសៀលថ្ងៃទី០១ វិច្ឆិកា ម្សិលមិញ នាងនិងឪពុកម្តាយបានទៅចូលរួមពិធីបុណ្យកឋិនមួយនៅវត្តឈូក.សស្ថិតក្នុងឃុំ វាលពន់ ស្រុកឧដុង្គ ខេត្តកំពង់ស្ពឺ ។ ហើយពេលដែលនាងកំពុងនៅម្នាក់ឯង ស្រាប់តែមានបុរស៤នាក់ បានចូលមកចាប់អូសនាងដាក់លើម៉ូតូដឹកចេញទៅ តែនាងហាក់ដូចត្រូវថ្នាំសណ្តំអ៊ីចឹង ឃើញឪពុកម្តាយចង់ស្រែកឱ្យជួយ តែស្រែកមិនរួច ។
បន្ទាប់មក ជនទាំងនោះបានដឹកនាងមកផ្ទះជួលខាងលើ ហើយ៣នាក់បានទៅអស់ សល់តែម្នាក់ ជាជនសង្ស័យនេះ ។ ហើយជនបានទៅប្រាប់ម្តាយមីង និងបងដែលស្នាក់ក្នុងបន្ទប់ជួលនោះថា រូបនាងជាសង្សារ ។ ស្រាប់តែនៅព្រឹកកើតហេតុ ពេលដែលបង និងម្តាយមីងជននោះ ចេញទៅធ្វើការរោងចក្រអស់ ជននេះធ្វើសកម្មភាពចាប់នាងរំលោភ តែត្រូវនាងរើបំរះ និងរត់ចេញពីក្នុងបន្ទប់ជួលនោះស្រែកឱ្យគេជួយ បង្កការភ្ញាក់ផ្អើលតែម្តង។
ទោះបីជាយ៉ាងណា ជនសង្ស័យរួមទាំងនារីរងគ្រោះ ត្រូវបានសមត្ថកិច្ចបញ្ជូនទៅប៉ុស្តិ៍ចោមចៅ ដើម្បីធ្វើការសួរនាំសាច់រឿងបន្ត។