រន្ធត់ណាស់ !! សោកនាដកម្មស្លាប់ទាំងគ្រួសារដោយរថយន្តបើកលឿន ហ្វាំងមិនទាន់

ខេត្តកំពង់ធំ៖ កាលពីវេលាម៉ោង៥និង៤០នាទីល្ងាច ថ្ងៃទី៨វិច្ឆិកា ២០១៦នេះ នៅលើកំណាត់ផ្លូវជាតិលេខ៦ ស្ថិតភូមិសានគរ ឃុំសានគរ ស្រុកកំពង់ស្វាយ ខេត្តកំពង់ធំ។ ដោយរថយន្តបុកម៉ូតូ បណ្ដាលឲ្យមនុស្ស១គ្រួសារ៣នាក់ រួមមានជីតា កូនស្រី និងចៅស្រី ស្លាប់ យ៉ាងអាណោចអាធ័ម ខណៈពួកគាត់កំពុងតែជិះម៉ូតូឆ្លងផ្លូវ ត្រូវរថយន្ដទេសចរណ៍មួយគ្រឿងបើកបរក្នុងល្បឿនលឿនបុក ពេញទំហឹង។
បើយោងតាមមន្ដ្រីនគរបាលមូលដ្ឋាន បានឲ្យដឹងថា មុនពេលកើតហេតុ ម៉ូតូរបស់ជនរងគ្រោះជិះគ្នា៣នាក់ បានធ្វើដំណើរឆ្លងកាត់ផ្លូវ ស្រាប់តែពេលកំពុងតែឆ្លងនោះ ក៏មានរថយន្ដមួយគ្រឿង ប្រភេទទេសចរណ៍ ព័ណ៌ខ្មៅ ពាក់ស្លាកលេខបន្ទាយមានជ័យ 2A-6280 បានបុកចំពីមុខពេញទំហឹង បណ្ដាលជនរងគ្រោះ៣នាក់ស្លាប់ភ្លាមៗ នៅនឹងកន្លែងតែម្ដង ហើយអ្នកបើកបរបានរត់គេចខ្លួនបានស្រមោល។ នគរបាលបញ្ជាក់ថា ជនរងគ្រោះទី១-ឈ្មោះ ឆុន ឆោម អាយុ៦៧ឆ្នាំ ទី២-ឈ្មោះ ជា ម៉ុន អាយុ២៥ឆ្នាំ និងទី៣-ឈ្មោះ ឆេង ណែ អាយុ២ឆ្នាំ សាកសពរស់នៅភូមិសានគរ ឃុំសានគរ ស្រុកកំពង់ស្វាយ។
ក្រោយពេលកើតហេតុ សមត្ថកិច្ចបានទាក់ទងទៅក្រុមគ្រួសារ ដើម្បីយកសាកសពទៅធ្វើបុណ្យតាមប្រពៃណី រីឯវត្ថុតាងទាំង២ ត្រូវបានយកទៅរក្សាទុក ដោះស្រាយតាមក្រោយ៕