ញាក់សាច់ ! ឃាត់យុវជន៧នាក់ ស្ទាបទៅអត់ស្លៀកលីអូ៣នាក់

រាជធានីភ្នំពេញ ៖ យុវជន៧នាក់ក្នុងនោះមាន៣នាក់ក្បាលត្រងោល ហើយពេលស្ទាបទៅអត់ស្លៀកខោលីអូទៀត ពេលធ្វើការសួរនាំទើបដឹងថាជាសង្ឃ២អង្គ និងម្នាក់ទៀតទើបនឹងសឹកពីបួសមុខភ្លើង បាននាំគ្នាជិះម៉ូតូគោលបំណងទៅច្រៀងខារ៉ាអូខេនៅតាមផ្លូវ២០០៤ ត្រូវបានសមត្ថកិច្ចចម្រុះឃាត់បាននៅចំណុចស្តុបណតប្រ៊ីជ ស្ថិតក្នុងសង្កាត់ទឹកថ្លា ខណ្ឌសែនសុខ កាលពីវេលាម៉ោង១១យប់ ថ្ងៃទី៣ ខែតុលា ឆ្នាំ២០១៦ ។
ប្រភពព័ត៌មានពីកម្លាំងនគរបាលបានអោយដឹងថា មុនពេលកើតហេតុកម្លាំងអន្តរាគមន៍ពិសេសខណ្ឌសហការជាមួយកម្លាំងចម្រុះក្រុង បានដាក់គោលដៅចាំត្រួតពិនិត្យ និងទប់ស្កាត់បទល្មើសក្នុងមូលដ្ឋាន ត្រង់ចំណុចស្តុបណតប្រ៊ិជ ស្រាប់តែប្រទះឃើញម៉ូតូ៣គ្រឿង ម៉ាក MSX ពណ៌ខ្មៅ ពាក់ស្លាកលេខ ភ្នំពេញ 1FU-8404 ម៉ាកនិច ពណ៌ស ពាក់ស្លាកលេខ ភ្នំពេញ 1CU-6376 និងម៉ាកនិច ពណ៌ក្រហមលាយខ្មៅ ពាក់ស្លាកលេខ ភ្នំពេញ 1CC-2322 ជិះសុទ្ធតែយុវជនវ័យក្មេងសរុប៧នាក់គួរឲ្យសង្ស័យ ក៏ឃាត់ដើម្បីត្រួតពិនិត្យឆែកឆេរ ។
ប្រភពបន្តថា ពេលស្ទាបទៅឃើញថា មានយុវជន៣នាក់ដែលក្បាលត្រងោលអត់សក់ ហើយអត់ស្លៀកខោលីអូទៀត ធ្វើឲ្យសមត្ថកិច្ចសង្ស័យធ្វើការសួរនាំ ហើយត្រូវបានយុវជន២នាក់ដែលក្បាលត្រងោលបានសារភាពថា ខ្លួនជាសង្ឃដែលគង់នៅក្នុងវត្តស្ទឹងមានជ័យ បានលួចដោះស្បង់ចីវរចេញដើម្បីលួចទៅច្រៀងខារ៉ាអូខេជាមួយមិត្តភក្តិនៅម្តុំខារ៉ាអូខេផ្លូវ២០០៤ ចំណែកយុវជនក្បាលត្រងោលម្នាក់ទៀតបានប្រាប់ថា ខ្លួនទើបនឹងសឹកពីបួសមុខភ្លើងមួយអាទិត្យនៅឯខេត្តតាកែវ ហើយខឹងសាច់ញាតិក៏បានធ្វើដំណើរមកលេងមិត្តភក្តិនៅភ្នំពេញបានមួយថ្ងៃ ។
សមត្ថកិច្ចបានឲ្យដឹងទៀតថា យុវជនទាំង៧នាក់ខាងលើនេះមាន ១-ឈ្មោះ ទូ ផាន់និត អាយុ២២ឆ្នាំ ជានិស្សិត ស្នាក់នៅខណ្ឌដង្កោ, ២-ឈ្មោះ ណុក តួ អាយុ២២ឆ្នាំ មុខរបរអ្នកបើកបរ ស្នាក់នៅផ្ទះសង់ថ្មី ស្ថិតក្នុងភូមិដំណាក់ សង្កាត់ស្ទឹងមានជ័យ ខណ្ឌមានជ័យ, ៣-ឈ្មោះ មាឃ សីហា អាយុ២២ឆ្នាំ មុខរបរចុងភៅ ស្នាក់នៅផ្ទះជួល ភូមិប៉េសេ សង្កាត់ទឹកថ្លា ខណ្ឌសែនសុខ, ៤-ឈ្មោះ ជុន វិចិត្រ អាយុ២២ឆ្នាំ មុខរបរសន្តិសុខឯកជន ស្នាក់នៅផ្ទះជួល ភូមិប៉េសេ សង្កាត់ទឹកថ្លា ខណ្ឌសែនសុខ, ៥-ឈ្មោះ សុខ ពិសិដ្ឋ អាយុ២៥ឆ្នាំ ជាសង្ឃនៅវត្តស្ទឹងមានជ័យ ស្ថិតក្នុងភូមិទ្រា សង្កាត់ស្ទឹងមានជ័យ ខណ្ឌមានជ័យ, ៦-ឈ្មោះ សុក ឡុង អាយុ១៨ឆ្នាំ ជាសង្ឃនៅវត្តស្ទឹងមានជ័យ និង ៧-ឈ្មោះ សុវណ្ណ អាយុ២២ឆ្នាំ មុខរបរសិស្ស ស្នាក់នៅភូមិពរចាក ឃុំពរចាក ស្រុកព្រៃកប្បាស ខេត្តតាកែវ ជាអ្នកបួសមុខភ្លើង ។
ក្រោយពេលចាប់ខ្លួន យុវជនទាំង៧នាក់ត្រូវបានកសាងសំណុំរឿងបញ្ជូនទៅកាន់អធិការដ្ឋាននគរបាលខណ្ឌសែនសុខ រង់ចាំការចាត់ការទៅតាមនីតិវិធី ៕