ពិតជាខ្លាំងមែន !! ហ៊ានប្លន់និងបាញ់សម្លាប់មន្ត្រីយោធាខ្មែរ ខណៈមកដល់ម៉ោងនេះ រកមិនទាន់ឃើញ

ភ្នំពេញ៖ កាលពីវេលាម៉ោង១និង៥៥នាទីថ្ងៃ ទី៦វិច្ឆិកា ២០១៦នេះ នៅចំណុចដីឡូត៍មួយកន្លែង ដែលមានទីតាំងស្ថិតនៅក្បែររង្វង់មូលថ្នល់បំបែកចោមចៅ ស្ថិតក្នុងភូមិព្រៃជីសាក់ សង្កាត់ចោមចៅ ខណ្ឌពោធិ៍សែនជ័យ ភ្នំពេញ។
ដោយមានការសង្ស័សថា មានជនជាតិចិន២នាក់បានធ្វើសកម្មភាពភ្ជង់ប្លន់យកកាបូបលុយពី ជនជាតិចិនដូចគ្នា២នាក់ផ្សេងទៀតបានលុយ៥០០ដុល្លារ ហើយរត់គេចខ្លួនចេញពីបណ្ណាគារយីហោ (ស៊ីន ហួរ) ប៉ុន្តែត្រូវបានជនរងគ្រោះ និងអ្នកជិតខាងនាំគ្នារត់ដេញតាម និងស្រែកថា ចោរៗ បង្កឲ្យមានការភ្ញាក់ផ្អើលយ៉ាងខ្លាំងតែម្ដង។
យោងតាមប្រភពឲ្យដឹងថា ដំបូងឡើយ ជនសង្ស័យជាជនជាតិចិន២នាក់បានជិះម៉ូតូចូលទៅធ្វើសកម្មភាពភ្ជង់ ប្លន់យកកាបូបលុយពីជនរងគ្រោះដែលជាជនជាតិចិន២នាក់ផ្សេងទៀតនៅ ក្នុងបណ្ណាគារ (ស៊ីន ហួរ) ដែលមានទីតាំងស្ថិតនៅក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ ។ លុះប្លន់បានហើយ ជនសង្ស័យម្នាក់រត់ឡើងម៉ូតូមិនទាន់ ក៏រត់គេចខ្លួនដោយថ្មើរជើង ហើយត្រូវបានជនរងគ្រោះ និងប្រជាពលរដ្ឋដែលជាអ្នកជិតខាងនាំគ្នាដេញតាម និងស្រែកថា ចោរៗ បង្កឲ្យមានការភ្ញាក់ផ្អើល ហើយប្រជាពលរដ្ឋដែលមានទីលំនៅតាមដងផ្លូវនោះនាំគ្នាអើតមើល ក៏ត្រូវជនសង្ស័យបាញ់១គ្រាប់ ប៉ុន្តែមិនបានបណ្ដាលឲ្យត្រូវនរណាម្នាក់នោះឡើយ បន្ទាប់មកជនសង្ស័យបានរត់បន្តទៀតរហូតដល់ចំណុចដីឡូត៍ផ្ទះវីឡា មួយកន្លែង។
ប្រភពបន្តទៀតថា ខណៈដល់ចំណុចដីឡូត៍ផ្ទះវិឡានោះ ដោយសារសម្រែក ចោរៗ មន្ត្រីយោធា២នាក់បានអើតមើល ក៏ត្រូវបានជនសង្ស័យបាញ់២គ្រាប់បណ្ដាលឲ្យរងរបួសធ្ងន់ម្នាក់ និងបានស្លាប់ពាក់កណ្ដាលផ្លូវពេលបញ្ជូនទៅមន្ទីរពេទ្យ ចំណែកម្នាក់ទៀតរបួសស្រាល រួចហើយជនសង្ស័យបានរត់គេចខ្លួនចូលទៅក្នុងដីឡូត៍មួយកន្លែងក្បែរ នោះបាត់ ។
យោងតាមសមត្ថកិច្ចដែលនៅកន្លែងកើតហេតុឲ្យដឹងថា ជនរងគ្រោះដែលស្លាប់នោះឈ្មោះ យ៉េន រីណង់ អាយុ២៣ឆ្នាំ ជាមន្ត្រីយោធានៅកងពលតូច ង៧០ មានទីលំនៅក្នុងភូមិសំរោង ឃុំបារាយណ៍ ស្រុកបារាយណ៍ ខេត្តកំពង់ធំ និងអ្នករងរបួសឈ្មោះ យី សុខហេង អាយុ២៦ឆ្នាំ ជាយោធានៅអង្គភាពជាមួយគ្នា ។ ដោយឡែកជនរងគ្រោះដែលជាជនជាតិចិនម្ចាស់កាបូបលុយនោះនៅមិនទាន់ ត្រូវបានស្គាល់ឈ្មោះនៅឡើយទេ ។
ប្រភពពីសមត្ថកិច្ចបានឲ្យដឹងទៀតថា រហូតមកដល់ល្ងាចថ្ងៃដដែលនេះ កម្លាំងនគរបាលខណ្ឌពោធិ៍សែនជ័យបានធ្វើការឡោមព័ទ្ធ និងរុករកអស់ជាច្រើនម៉ោងហើយ ប៉ុន្តែនៅមិនទាន់រកឃើញជនសង្ស័យនៅឡើយទេ ៕