រថយន្តដឹកម្នាស់ បុកអ្នកបើកបរម៉ូតូធំពេញមួយទំហឹង, សាកសពជនរងគ្រោះមើលលែងយល់

(ពោធិ៍សាត់)៖ រថយន្តដឹកផ្លែម្នាស់មួយគ្រឿង បើកជែងទៅបុកបុសម្នាក់កំពុងតែបើកម៉ូតូធំច្រាស់ទិសគ្នាពេញមួយទំហឹង បណ្តាលឲ្យស្លាប់ភ្លាមៗនៅនឹងកន្លែងកើតហេតុ ហើយសាកសពជនរងគ្រោះមើលលែងយល់។
ហេតុការណ៍គ្រោះថ្នាក់ដ៏គួរឲ្យរន្ធត់មួយនេះ កើតឡើងនៅវេលាម៉ោង ០៤ និង១៥នាទីល្ងាច ថ្ងៃទី០២ ខែតុលា ឆ្នាំ២០១៦នេះ នៅលើកំណាត់ផ្លូវជាតិលេខ៥ ចន្លោះបង្គោលគីឡូម៉ែត្រលេខ ១៥៨ និង១៥៩ ស្ថិតក្នុងភូមិសារវ័ន្ត ឃុំស្នាអន្សា ស្រុកក្រគរ ខេត្តពោធិ៍សាត់។
លោក ឯម រុន អធិការនគរបាលស្រុកក្រគរ បានប្រាប់ភ្នាក់ងារ Fresh News ឲ្យដឹងថា ហេតុការណ៍គ្រោះថ្នាក់ដ៏គួរឲ្យរន្ធត់មួយនេះ បង្កដោយរថយន្តដឹកម្នាស់ ម៉ាក KIA ព័ណ៌ស ចំណុះ២,៥តោន ពាក់ស្លាកលេខ ភ្នំពេញ 3B-1623 បើកបរដោយឈ្មោះ ម៉ា ពិសាល ភេទប្រុស អាយុ ២៤ឆ្នាំ ជនជាតិខ្មែរ រស់នៅភូមិព្រៃស្វាយ ឃុំព្រៃស្វាយ ស្រុកមោងឬស្សី ខេត្តបាត់ដំបង។
លោកអធិការបន្តថា មុនពេលកើតហេតុរថយន្តបង្ក បានបើកពីលិចទៅកើត លុះមកដល់ចំណុចកើតហេតុខាងលើ បានបើកជែងលើគំនូសចែកទ្រូងផ្លូវ រួចក៏ជ្រុលទៅបុកជាមួយម៉ូតូធំ ម៉ាក UM ព៌ណខ្មៅ គ្មានផ្លាកលេខ ក្នុងទិសដៅបញ្ច្រាស់ទិសគ្នា បើកបរដោយឈ្មោះ ឈន ពៅ ភេទប្រុស អាយុ ៥៦ឆ្នាំ ជនជាតិខ្មែរ បច្ចុប្បន្នរស់នៅភូមិស្នាអន្សា ឃុំស្នាអន្សា ស្រុកក្រគរ ខេត្តពោធិ៍សាត់ បណ្តាលឲ្យអ្នកបើកបរម៉ូតូ ស្លាប់នៅនឹងកន្លែងកើតហេតុ។
ក្រោយពេលកើតហេតុ សាកសពជនរងគ្រោះ ត្រូវបានក្រុមគ្រួសារយកទៅធ្វើបុណ្យតាមប្រពៃណី ដោយឡែកអ្នកបើកបររថយន្តត្រូវបានឃាត់ខ្លួន នៅអធិការដ្ឋាននគរបាលស្រុកក្រគរ ចំពោះវត្ថុតាងរថយន្ត និងម៉ូតូ រងចាំដោះស្រាយនៅពេលក្រោយ។
គួរបញ្ជាក់ថានៅវេលាម៉ោង ០៥ និង៥០នាទីយប់ ថ្ងៃទី០២ ខែវិច្ឆិកា ឆ្នាំ២០១៦នេះ នៅកំណាត់ផ្លូវលេខ១៥៥ ចន្លោះបង្គោលគីឡូម៉ែត្រលេខ៣៧ និង៣៨ ស្ថិតក្នុងភូមិក្រូចឆ្មា ឃុំលាច ស្រុកភ្នំក្រវាញ ខេត្តពោធិ៍សាត់ ក៏មានគ្រោះថ្នាក់ចរាចរណ៍មួយទៀត បង្កដោយរថយន្តស៉ាំយ៉ុង ព័ណ៌ស ពាក់ស្លាកលេខ ភ្នំពេញ 2J-8416 បើកបរដោយឈ្មោះ ជា សត្យា ភេទប្រុស អាយុ ៣១ឆ្នាំ រស់នៅភូមិស្បូវរីក ឃុំលាច ស្រុកភ្នំក្រវាញ ធ្វើដំណើរពីជើងទៅត្បូង លុះមកដល់ចំណុចកើតហេតុខាងលើ រថយន្តបង្កបានបត់ឆ្វេង ហើយត្រូវបានម៉ូតូម៉ាក Dream ស៊េរី២០១០ ព័ណ៌ខ្មៅ ពាក់ស្លាកលេខ ពោធិ៍សាត់ 1C-2841 បើកបរដោយឈ្មោះ ពេជ ចំរើន ភេទប្រុស អាយុ ២៣ឆ្នាំ រស់នៅភូមិលាច ឃុំលាច ស្រុកភ្នំក្រវាញ បានបុកពីក្រោយពេញមួយទំហឹង (របួសធ្ងន់) ពេលបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្តពោធិ៍សាត់ បានដាច់ខ្យល់ស្លាប់តាមផ្លូវតែម្តង។
បច្ចុប្បន្នវត្ថុតាង រថយន្ត និងម៉ូតូ ត្រូវបានយកទៅរក្សាទុកនៅផ្នែកសណ្តាប់ធ្នាប់សាធារណៈ រងចាំដោះស្រាយនៅពេលក្រោយ ដោយឡែកសាកសពជនរងគ្រោះ ត្រូវបានក្រុមគ្រួសាររៀបចំធ្វើបុណ្យតាមប្រពៃណី៕