នៅក្នុងសប្ដាហ៍នេះកីឡាករកម្ពុជា រឿង សោភ័ណ្ឌ មកពីក្លិបមកុដរាជសីហ៍ ត្រូវជួប ប្រកួតជាមួយកីឡាករថៃឈ្មោះហ្វានិមិត្ត វិរិយៈហ្វាម និងឡុង សុភី មកពីក្លិបសាលវ័ន្តកីឡា ជួបកីឡាករថៃឈ្មោះផ្លាំងនុម លូកម៉ាខាមរ៉ាន ។ សម្រាប់ការប្រកួតនេះឈានចូលដល់ជុំទី៤ហើយ ប៉ុន្តែពួកគេទាំង២គូនេះ ទើបតែប្រកួតបានចំនួន២លើកម្នាក់ប៉ុណ្ណោះ ។ រឿង សោភ័ណ្ឌ គឺជាកំពូលអ្នកប្រើស្នៀតកណ្ដាប់ដៃឆ្វេងដ៏សាហាវម្នាក់ និងជាអ្នកប្រដាល់គួរឱ្យទុកចិត្តទៀតផង ។ តាំងពីថ្ងៃប្រកួតបើកឆាកដំបូងម្ល៉េះនរណាក៏មានជំនឿចិត្តលើកីឡាករ រូបនេះដែរ ប៉ុន្តែគេបែរជាចាញ់ធ្វើឱ្យរបូតបាត់អស់៣ពិន្ទុ ។ ទោះជាយ៉ាងណា រឿង សោភ័ណ្ឌ បានធ្វើឱ្យអ្នកគាំទ្ររូបគេមានអារម្មណ៍ល្អឡើងវិញ ក្រោយពីបានឈ្នះការប្រកួតក្នុងជុំទី២វិញ។
ដោយឡែក សម្រាប់ការប្រកួតលើកនេះ គេមិនទាន់ហ៊ានធានាថាយ៉ាងណានោះទេ ព្រោះគូប្រកួតរបស់គេ គឺជាអ្នកប្រដាល់ជើងខ្លាំងមួយរូបដែលមិនងាយស្រួលបង្ក្រាបឡើយ សូម្បីតែប្រវត្តិប្រកួតក៏មិនអាចប្រៀបផ្ទឹមជាមួយ កីឡាករថៃនេះបានដែរ ។ រឿង សោភ័ណ្ឌ ធ្លាប់ប្រកួតបានជាង១៦០លើកប៉ុណ្ណោះ ចំណែកហ្វានិមិត្ត វិរិយៈហ្វាមវិញ ធ្លាប់ប្រកួតបានរហូតដល់ទៅជាង១៨០លើកឯណោះ ។ សម្រាប់ការប្រកួតលើកនេះ រឿង សោភ័ណ្ឌ ក៏មានជំនឿចិត្តខ្លះដែរ តែដោយសារតែគេចាញ់ប្រៀបកម្ពស់គូប្រកួតចំពេលគេគេមានបញ្ហាផ្នែក សុខភាព គឺដុះសាច់ក្នុងច្រមុះផងនោះធ្វើឱ្យអ្នកដឹងរឿងនេះមានសង្ឃឹម តិចតួចប៉ុណ្ណោះ ។
ឡុង សុភី ជួបផ្លាំងនុម លូកម៉ាខាមរ៉ាន លើកនេះ មិនអាចទាយទុកមុនបានឡើយ ដោយសារ ឡុង សុភី គឺជាអ្នកប្រដាល់ជើងចាស់មួយរូបដែលមានល្បិចប្រយុទ្ធពេញខ្លួន តែការប្រកួតទាំង២លើកមកនេះ គេបានភ្លាត់ស្នៀតចាញ់អស់មួយលើកហើយ ។ ទោះបីប្រកួតលើកនេះ ឡុង សុភី មានជំនឿចិត្តឈ្នះច្រើន ដោយសារតែគូប្រកួតមានសមត្ថភាពមិនលើសខ្លួន ទាំងមាឌ និងកម្ពស់ក៏ប្រដំប្រសងគ្នាទៀត ប៉ុន្តែបើមើលលើកម្លាំងស៊ុហ្វប្រហែលជាចាញ់កីឡាករថៃហើយ ។ ចាំមើលលើកនេះ ឡុង សុភី មានសំណាងរកបាន៣ពិន្ទុបន្ថែមទៀតឬអត់ ។
ចំណែកគូប្រកួតអមប្រចាំសប្ដាហ៍នេះមានកីឡាករធន់ តារា មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករផាន ចំណាន មកពីក្លិបតាឡីដំរីមានរិទ្ធ និងកីឡាករអៀង ចាន់ល័ក្ខ មកពីក្លិបមកុដរាជសីហ៍ ប្រកួតជាមួយកីឡាករសុខ ចិន្ដា មកពីក្លិបឃ្លាំងមឿងកីឡា ៕
ប្រភព៖កោះសន្តិភាព
loading...
0 comments:
Post a Comment